'Ugma Damlag'

Tan-aw nimo, kanus-a kaha ta makabalik sa atong gihandom nga normal?

Pakighinabi sa atong kahigalaan. Suroy-suroy sa kadalanan. Pili-pili sa mga ukay nga nagtapun-og sa bagsakan. Baklay gikan CNU paingon sa Krus ni Magellan. Tapok sa pungko-pungko una mahutdan ug lumpia'ng sayote. Tungod sa katrapik inig naog sa dyip makalimot ug plete.

Pastilan uroy nis bay COVID-19, nagpatuyang man sa gibati! Kutob na ba lamang kami sa paghinaot nga magkaatubangay sa among mga klasmet ug magtutudlo? Igo na ba lamang kami sa paghanduraw sa mga kabanay nga di makauli sa pamilya nga naa sa probinsiya? Taman sa paglaom na ba lamang kami nga nag-antos nga makahaw-as sa kalisdanan?

Apan miingon ang Mga Taga Roma 12:12, "Pagkalipay kamo diha sa inyong paglaum, pagpailub kamo sa panahon sa kagul-anan, lumahutay kamo sa pag-ampo."

Ug dili pa man gani itugot karon, basin 'ugma damlag', o sa umaabot nga panahon.

Mga Pulong ni Lorille Antoinette Mata

Paghan-ay ni Kiziah Magbanua